२३ ऑक्टोबरला विसर्जन मिरवणूक

 एकता नवदुर्गा मंडळाच्या उत्सवात आठ हजार नागरिकांनी घेतला महाप्रसादाचा लाभ

अकोला : शहरातील मलकापूर परिसरातील व्ही.एच.बी. कॉलनी येथील एकता नवदुर्गा उत्सव मंडळाच्या वतीने आयोजित नवरात्रोत्सवाला नागरिकांचा उत्स्फूर्त प्रतिसाद मिळाला. कार्यकर्त्यांची एकजूट, सामूहिक नियोजन आणि नागरिकांच्या सहभागातून उत्सवाचे भव्य आयोजन करण्यात आले. १३ फूट उंचीची देवीची मूर्ती, आकर्षक मंडप सजावट, गरबा रास आणि विविध सांस्कृतिक कार्यक्रम उत्सवाची प्रमुख आकर्षणे ठरली.

११ ते २३ ऑक्टोबरदरम्यान आयोजित या उत्सवाची सुरुवात घटस्थापना व देवीच्या आगमन सोहळ्याने झाली. नवरात्रोत्सवाच्या कालावधीत विविध धार्मिक, सांस्कृतिक कार्यक्रमांसह स्पर्धांचे आयोजन करण्यात आले. ललिता पंचमीला महिला भजन मंडळाचे सादरीकरण, तर अष्टमीला होमहवन करण्यात आले.

दररोज आयोजित गरबा रासमध्ये तरुणाईचा सहभाग लक्षणीय होता. महिला, लहान मुले आणि ज्येष्ठ नागरिकांनीही मोठ्या संख्येने सहभाग नोंदविला. गरबा नृत्य आणि पारंपरिक वेशभूषा स्पर्धेतील विजेत्यांना दररोज पारितोषिके देण्यात आली. लहान मुलांच्या गरबा नृत्याने उपस्थितांचे लक्ष वेधून घेतले.

बुधवारी (दि. २१) आयोजित महाप्रसादाचा सुमारे आठ हजार नागरिकांनी लाभ घेतला. उत्सवादरम्यान विविध क्षेत्रांतील मान्यवरांसह सर्व राजकीय पक्षांच्या नेत्यांनी मंडळाला भेट दिली. पोलीस अधिकाऱ्यांनीही आरतीला उपस्थिती लावून देवीचे दर्शन घेतले.

अध्यक्षपदाऐवजी सामूहिक नेतृत्वाची संकल्पना, मंडळात स्वतंत्र अध्यक्ष नसून प्रत्येक कार्यकर्ता हा अध्यक्ष असल्याची संकल्पना राबविण्यात येते. या सामूहिक नेतृत्वातून कार्यकर्त्यांनी विविध जबाबदाऱ्या पार पाडत उत्सवाचे नियोजन केले. व्ही.एच.बी. कॉलनीतील नागरिकांच्या सहभागामुळे सामाजिक एकोपा आणि एकजुटीचे चित्र पाहायला मिळाले.

शुक्रवारी (दि. २३) सायंकाळी ६ वाजता देवीच्या विसर्जन मिरवणुकीचे आयोजन करण्यात आले आहे. या मिरवणुकीत नागरिकांनी मोठ्या संख्येने सहभागी व्हावे, असे आवाहन मंडळाच्या वतीने करण्यात आले आहे.