250 वर्षे प्राचीन जगन्नाथ मंदिरात अनसर पूजा सुरू, 15-16 जुलैला रथयात्रा उत्सव

  

अकोला, 4 जुलै 2026 : भगवान श्री जगन्नाथ जी यांची गुप्त पूजा व अनसर उत्सव सध्या सुरू आहे. पंजाबराव कृषी विद्यापीठ परिसरातील अडीचशे वर्षे प्राचीन श्री जगन्नाथ जी, सुभद्रा जी व बलदेव जी मंदिरात वेदपाठी ब्राह्मणांच्या मंत्रघोषात विशेष पूजा-अर्चना संपन्न होत आहे.

अनसर काळात भगवानांना ताप आल्याने त्यांच्या लवकर स्वस्थ होण्यासाठी शाल भेट देऊन विशेष प्रार्थना करण्यात आली. अकोला जिल्ह्यातील सर्व धरणे भरून पिकांना पाणी मिळावे, शेतकरी सुखी व्हावा व पिण्याच्या पाण्याचा प्रश्न सुटावा यासाठी वेदपाठी ब्राह्मण हेमंत शर्मा, विजय दुबे, संतोष शुक्ला, जनक जोशी, वल्लभ शर्मा, राधेश्याम शर्मा, दिनेश शर्मा यांनी वेदमंत्रांनी पूजा केली. यावेळी गिरीश जोशी, रमाकांत भरकर, माधव मानकर, गिरीराज तिवारी, संजय जोशी, मनोहर मानकर, प्रशांत लोहिया, अजय जोशी, अजय गुल्हाने, नितीन ढोले आदी भाविक उपस्थित होते. डॉ. संजय शर्मा हे सुद्धा सहभागी झाले होते.

15-16 जुलैला रथयात्रा महोत्सव

  

दुबे परिवाराच्या वतीने माहिती देण्यात आली की, दि. 15 जुलै 2026 रोजी या मंदिर परिसरात रथयात्रा निमित्त विशेष पूजा-अर्चना व धार्मिक अनुष्ठान होणार आहे. दि. 16 जुलै 2026 रोजी भव्य रथोत्सव साजरा करण्यात येणार आहे. यानिमित्ताने अकोला पंचकोशीतील मोठ्या प्रमाणात भाविक भक्त दर्शनासाठी येणार आहेत. रथयात्रेनिमित्त विशेष महाप्रसादाचे वितरण व विविध धार्मिक कार्यक्रमांचे आयोजन करण्यात आले आहे.

मंदिर विश्वस्त व दुबे परिवाराने सर्व भाविकांना रथयात्रेत सहभागी होऊन भगवान जगन्नाथजींचा आशीर्वाद घेण्याचे आवाहन केले आहे.