श्री शिवाजी कनिष्ठ महाविद्यालयाच्या विद्यार्थ्यांची राष्ट्रीय बाॅक्सिंग स्पर्धेसाठी निवड

 

अकोला : येथील श्री शिवाजी कनिष्ठ महाविद्यालयाच्या विद्यार्थ्यांनी यापूर्वी विविध क्रीडा स्पर्धांमध्ये अभूतपूर्व यश संपादन केले आहे. यात आणखी आनंदाची बाब म्हणजे, प्राचार्य डॉक्टर रामेश्वर भिसे यांच्या मार्गदर्शनात या कनिष्ठ महाविद्यालयातील क्रीडापटूंची राष्ट्रीय बॉक्सिंग स्पर्धेसाठी निवड झाली आहे.

स्व. वसंत देसाई स्टेडियम अकोला येथे दिनांक 25 व 26 नोव्हेंबर 2024 दरम्यान शालेय राज्यस्तर बॉक्सिंग स्पर्धा आयोजित करण्यात आली होती. या स्पर्धेत श्री शिवाजी कनिष्ठ महाविद्यालय अकोला च्या खेळाडूंनी सहभाग नोंदवला. 

राज्यस्तर शालेय बॉक्सिंग स्पर्धेत 17 वर्षांखालील गटात महाविद्यालयाची खेळाडू कु. श्रद्धा मंगेश खोब्रागडे हिने उत्कृष्ट प्रदर्शन करीत कांस्यपदक मिळविले तर 19 वर्षाखालील गटात कु. पलक अजय झांबरे हिने सुवर्ण पदक प्राप्त केले. देवांग दुधाराम महागणकर याने कांस्यपदक तर जय सुनील उचाटे याने रौप्य पदक प्राप्त केले या स्पर्धेत महाविद्यालयाच्या खेळाडूंनी नेत्रदीपक कामगिरी करीत चार पदक मिळविले. कु पलक अजय झांबरे हिची दिल्ली येथे होणाऱ्या राष्ट्रीय स्पर्धेकरीता निवड झाली.

या सर्व खेळाडूंचे महाविद्यालयाचे मा. प्राचार्य डॉ. रामेश्वर भिसे , श्री सतीशचंद्र भट (जिल्हा क्रीडा अधिकारी) ,श्री राजेश गीते (प्रबंधक), प्रा. सुशीला मळसणे (कनिष्ठ विभाग प्रमुख) ,श्री संजय काळे (क्रीडा विभाग प्रमुख), श्री नितीन वाघमारे (क्रीडाशिक्षक) श्री गजानन कबीर, श्री आदित्य माने (बॉक्सिंग प्रशिक्षक ) तसेच महाविद्यालयातील सर्व विभाग प्रमुख शिक्षक व शिक्षकेतर कर्मचारी यांनी सर्व खेळाडूंचे कौतुक करून पुढील स्पर्धेसाठी शुभेच्छा दिल्या.